بةرنامةي ليست

بةرنامةي ليست
به‌رنامه‌ی لیستی 104 ی كۆمه‌َڵی ئیسلامی

شريتي هةوال

لاإلهَ إلا الله مُحَمَّدٌ رَسولُ الله

السبت، 14 سبتمبر 2013

ئەحمەدی حاجی رەشید: لەم هەڵبژاردنەدا ئیسلامییەکان 18 تا 20 كورسی پەرلەمان بەدەستدەهێنن

ئەحمەدی حاجی رەشید، ئەندامی سەرکردایەتی کۆمەڵی ئیسلامیی کوردستان ... فۆتۆ: رووداو
ئاژانسی کۆمەڵنیوز:

دوای تێپەڕبوونی چەند كاژێرێك بەسەر دەستپێكردنی بانگەشەی هەڵبژاردندا، لە هەڤپەیڤینێكدا لەگەڵ (رووداو)، ئەحمەد رەشید، ئەندامی سەركردایەتیی كۆمەڵی ئیسلامیی کوردستان،رایدەگەیەنێت، پێشبینی دەکەم ئیسلامییەکان 18 تا 20 کورسی پەرلەمان بەدەستبهێنین.

رووداو: ئۆپۆزیسیۆن دەڵێت نەخشەی سیاسی لەم هەڵبژاردنەدا دەگۆڕێت، ئەو دڵنیاییە لەكوێوە سەرچاوەی گرتووە؟

ئەحمەد رەشید: هەر پارتێك پێشبینی دەكات دەنگەكانی زیاد دەبێت، یەكێك لەو گۆڕانكارییانەی نەخشە سیاسییەكە ئەوەیە کە ئەو پارتانەی هاوپەیمان بوون، واتە پارتی و یەكێتی، رێژەی دەنگەكەی نێوانیان بە یەكسانی نامێنێتەوە. پارتی ئەمجارە دەیەوێ بە یەكێتی بڵێت ئەوەی تاوەکو ئێستا شەڕت لەسەر دەكرد گوایە بێبەشكراوی لە دەسەڵات و پۆستەكان، ئەوە دەنگی راستەقینەی خۆتە و هەر ئەوەندەت پۆست بەردەكەوێ. 

پارتی دەیەوێ رێككەوتنی ستراتیژی بمێنێتەوە، بەڵام دەشیەوێ یەكێتی و پارتی قەبارەی راستەقینەی خۆیان بزانن. چونكە پێیوایە كاتی ئەوە هاتووە بەو هەڵبژاردنە ئەوە یەكلایی ببێتەوە كە كێ سوودی لە رێككەوتنی ستراتیژی بینیوە. رێژەی دەنگی ئۆپۆزیسیۆنیش گۆڕانكاریی بەسەردا دێت، چونكە ساڵی 2009، كۆمەڵ و یەكگرتوو كورسییان رۆیشت بۆ سۆسیالیست و زەحمەتكێشان، ئەو كورسییانە وەردەگرنەوە.

رووداو: ئۆپۆزیسیۆن پێشبینیی خۆی لەسەر جیاكردنەوەی لیستی یەكێتی لە پارتی بونیاتناوە، یان ئەوە تەنیا بانگەشەیە؟ 

ئەحمەد رەشید: پارتی دەیەوێت قەبارەی یەكێتی بزانێ و یەكێتیش دەیەوێ كارێك بكات دوای ئەو هەڵبژاردنە ئەو پۆستانە بەدەستبهێنێتەوە كە
 لەدەستیدا بوون. سەركردەكانی ئۆپۆزیسیۆن لەڕووی دەنگەوە وا پێشبینی دەكەن، خاڵی دووەمیش پێیانوایە ئۆپۆزیسیۆنبوون بەجێبهێڵن و دەسەڵات بگرنە دەست. بەڵام پێشنیازم بۆ ئۆپۆزیسیۆن ئەوەیە کە ئەزموونی عێراق رەچاو بكات بۆ پێكهێنانی حكومەت، ئەویش ئەوەیە کە لیستی عێراقییە زۆرینە بوو، بەڵام لیستی دەوڵەتی یاسا بە كۆكردنەوەی كوتلەكان بووە زۆرینە.

رووداو: ئەو لیستانە کێن كە ئۆپۆزیسیۆن دەتوانێ رایانبكێشێت؟

ئەحمەد رەشید: لیستی دیكە هەیە، بەتایبەتی دوای هەڵبژاردن 

رووداو: بۆنموونە یەكێتی؟

ئەحمەد رەشید: ئاماژەكە ئەوەیە کە زۆرینەكان حكومەت پێكبهێنن. ئەو ئەگەرەش دوورە کە ئۆپۆزیسیۆن لەگەڵ یەكێتی حكومەت پێكبهێنێت. دووریشە ئۆپۆزیسیۆن خۆی بتوانێ رێژەی زۆرینە پێكبهێنێ. هێزی سێیەم هەركەسێک بێت، بەشداریی حكومەتی پێناكرێت. پارتی و یەكێتی هەركامیان زۆرینە بوون، باشترە ئۆپۆزیسیۆن لەگەڵ ئەو لایەنەدا حكومەت پێكبهێنێ.    

ئەگەر ئۆپۆزیسیۆن ئامادە نەبێت حكومەت لەگەڵ پارتی پێكبهێنێ، ئەوكات پارتی ناچارە لەگەڵ یەكێتی ئەم کارە بکات. یان ئەگەر ئۆپۆزیسیۆن ئامادە نەبێ لەگەڵ یەكێتی ئەوە بکات، ئەوە یەكێتی ناچارە دەست بە رێككەوتنی ستراتیژییەوە بگرێت.  

رووداو: هەست ناکەیت ئۆپۆزیسیۆن گوتارێكی گەورەی هەڵگرتووە؟ چونكە ناڵێت باشتر دەبین لە هەڵبژاردنی پێشوو، بەڵكو دەڵێت بەرەو دەسەڵات دەڕۆین، ئایا موفاجەئەی گەورە روودەدات؟

ئەحمەد رەشید: پێموانییە موفاجەئەی گەورە رووبدات. چونكە 70%ی دەنگدەران یەكلایی بوونەتەوە. من پێموایە دوای هەڵبژاردن، 3 كوتلەی گەورە دەردەكەون و حیزبە بچووكەكان لەو هەڵبژاردنەدا كۆتاییان پێدێت و ناگەنە پەرلەمان. ئەو کوتلانەش بریتین لە گرووپی ئۆپۆزیسیۆن، گرووپی پارتی و گرووپی یەكێتی. بە بڕوای من گرووپی ئۆپۆزیسیۆن گەورەترین كوتلە دەبێت.

رووداو: بە بۆچوونی هەندێك لە چاودێرانی سیاسی، ئەگەر نەخشەی سیاسی بگۆڕێت، ئەو گۆڕانە زیاتر لە سلێمانی دەبێت، ئەمە تا چەند راستە؟ 

ئەحمەد رەشید: داتاكان ئەوە پشتڕاستدەكەنەوە، بەڵام ئەمە ئەوەش ناگەیێنێت کە ئۆپۆزیسیۆن لە هەولێر دەنگی نەبێت. ئۆپۆزیسیۆن لە هەڵبژاردنی رابردوودا لە هەولێر 220 هەزار دەنگی هەبوو، یەكێتیش 180 هەزار دەنگی هەبوو. بۆیە پارتی ناتوانێ بڵێ بەتەنیا ئەو خاوەنی هەولێرە.

رووداو: ئەگەر وەكو هاوپەیمان یان نزیك لە گۆڕان قسە نەكەیت، بۆچوونت چییە لەبارەی قەبارەی گۆڕان و یەكێتییەوە، پێشتر دەگوترا یەكێتی هەستاوەتەوە، ئێستا گۆڕانیش دەڵێ بەرەو دەسەڵات دەڕۆین؟

ئەحمەد رەشید: تاوەكو پێش 30ی حوزەیرانی ئەمساڵ، یەكێتی كەوتبووە پێش گۆڕانەوە، بەڵام لەو رۆژەوە یەكێتی پاشەكشەی كردووە، چونكە بووەتە هۆی درێژكردنەوەی ویلایەتی سەرۆكی هەرێمی کوردستان و پەرلەمان و دواخستنی هەڵبژاردنی ئەنجوومەنی پارێزگاكان. خاڵێكی دیكە، كە زیانی لە یەكێتی داوە، نائامادەگی جەنابی مام جەلال-ە، پێشبینی دەكرێت ئێستاش گۆڕان لەپێش یەكێتییەوە بێت.

رووداو: ئێوە و گۆڕان و یەكگرتوو ئێستا 35 كورسیی پەرلەمانتان هەیە، ئەگەر كورسییەكانتان ببنە 45 كورسیش چۆن بەبێ یەكێتی حكومەت پێكدەهێنن؟ 

ئەحمەد رەشید: پێشبینی دەكەم كورسییەكانی ئۆپۆزیسیۆن بگاتە 40 كورسی. خۆ مەرج نییە ئۆپۆزیسیۆن هەر پشت بەو رێژەیە ببەستێت، وەكو گوتم دەكرێ لەگەڵ براوەی یەكەمی هەڵبژاردندا رێكبكەوێت.

رووداو: بزووتنەوەی گۆڕان بەرچاوڕوونیی داوەتە ئێوە كە چۆن دەسەڵات وەردەگرێت؟ 

ئەحمەد رەشید: هەموومان تێگەیشتووین لەوەی کە قۆناخی ئۆپۆزیسیۆن بوونمان تێپەڕاندووە.

رووداو: بەڵام كاتێک دەنگی پێویستتان نەبێت بۆ پێكهێنانی حكومەت، چۆن تێتانپەڕاندووە؟

ئەحمەد رەشید: ئەگەر نەتوانین دەسەڵات بگرینە دەست، بەشێوەیەك لە شێوەكانی دیكە دەبینە ئۆپۆزیسیۆن.

رووداو: ئەو جۆرەی دیكەی ئۆپۆزیسیۆن بوون چییە، مەگەر لەم خولەدا هەموو شێوازێكتان نەگرتەبەر: خۆپیشاندان، بایكۆت، رەتكردنەوەی پڕۆژە یاسا؟

ئەحمەد رەشید: مەبەستم تووندی و شلی نییە، هەندێك مەلەف هەبوون خاو بووین لەگەڵیاندا، مەلەف هەبووە بە تووندترین شێوە مامەڵەمان لەگەڵ كردووە، وەكو ئەوەی لە رۆژی 30ی حوزەیرانی ئەمساڵدا روویدا. 

رووداو: پێتوانییە لەئێستاوە دەرگایەكی گەورە كرابێتەوە لەبەردەم ئێوە و یەكێتیدا، بۆئەوەی بە ئەنجامەكانی هەڵبژاردن رازی نەبن. چونكە ئەگەر ئەنجامەكان بەدڵی لایەنەكان نەبێت، بابەتی ناوی مردووان دێننەوە گۆڕێ؟ 

ئەحمەد رەشید: كۆمیسیۆن خۆی ئەو دەرگایەی كردووەتەوە، چارەسەرمان نییە و دەبێ هەڵبژاردن بكرێت و دوانەخرێ. ئینجا لە هەڵبژاردنەكانی پێشووشدا تەزویر هەبووە و كراوە، ئێستا بەتایبەتی یەكێتی خۆی ئامادە كردووە، ئەگەر ئەنجامەكانی بەدڵ نەبوو، مەسەلەی ناوی مردووان و ناوی دووبارە دەهێنێتەوە ئاراوە. ئینجا پێمانوایە لە سلێمانی تەزویرات كەمتر دەبێ، تاوەكو هەولێر و دهۆك. ئینجا گۆڕان و یەكگرتوو و كۆمەڵ لەسەر بنەمای دەنگەكانی پێشوویان كارناكەن، بەڵكو پێیانوایە دەنگە ناڕازییەكان زۆرتر بوون.

رووداو: ئیسلامییەكان چەند كورسی دەهێنن؟

ئەحمەد رەشید: بە بڕوای من 18 تاوەکو 20 كورسی دەهێنین.

رووداو: رۆژانی بانگەشەی هەڵبژاردن لە سلێمانی چۆن دەگوزەرێن؟

ئەحمەد رەشید: لەسەرەتاوە ئارام دەبێت، بەڵام لە نێوەڕاستەوە تووند دەبێتەوە. پێموایە ئاڵۆزیشی لێدەكەوێتەوە، بەڵام ناگاتە شەڕی گەورە.


ليست هناك تعليقات:

إرسال تعليق